Sami Mustafa është regjisor, producent dhe skenarist dokumentar nga Kosova, i lindur në Plemetinë në vitin 1984. Ai është veçanërisht i njohur për punën e tij në dokumentimin e jetës, kulturës, identitetit dhe të drejtave të komunitetit rom. Karrierën në film e nisi në vitin 2003, kur si praktikant mësoi teknikat e realizimit të filmit në Plemetinë përmes organizatës Balkan Sunflowers.
Në vitin 2007 themeloi Romawood, një produksion i fokusuar në çështjet dhe jetën e komunitetit rom. Po atë vit inicioi projektin “Jekh Kham Jekh Sel / One Sun One Nation”, i cili u bë një prej projekteve më të rëndësishme në karrierën e tij. Mustafa ka prodhuar, drejtuar dhe shkruar më shumë se 50 dokumentarë të shkurtër, docu-fiction dhe dy filma të gjatë.
Filmi Road to Home u shfaq në Festivalin e Filmit në Kanë në vitin 2007 dhe ishte filmi i vetëm nga Kosova i prezantuar në atë edicion. Një tjetër projekt i rëndësishëm është Trapped by Law, dokumentar i realizuar gjatë pesë viteve, që trajton historinë e dy vëllezërve romë të dëbuar nga Gjermania në Kosovë. Filmi fitoi çmimin për dokumentarin më të mirë në Albanian Film Week në Nju Jork.
