Reporting House

Lana Čmajčanin

Lana Čmajčanin është artiste bashkëkohore nga Bosnja dhe Hercegovina, e lindur në Sarajevë në vitin 1983. Ajo ka përfunduar studimet master në skulpturë në Akademinë e Arteve të Bukura të Universitetit të Sarajevës, ndërsa ka vazhduar studimet e doktoratës në Akademinë e Arteve të Bukura në Vjenë. Čmajčanin jeton dhe vepron mes Sarajevës dhe Vjenës. Ajo është gjithashtu bashkëthemeluese dhe anëtare e organizatës për kulturë dhe art Crvena.

Praktika e saj artistike përfshin instalacionin, video-artin, performancën, fotografinë dhe instalacionet zanore. Krijimtaria e Čmajčanin përqendrohet në marrëdhëniet ndërmjet historisë, memories kolektive dhe strukturave të pushtetit politik e shoqëror, duke trajtuar veçanërisht pasojat e luftës në Bosnjë dhe Hercegovinë, dhunën strukturore, nacionalizmin dhe rolin e grave në shoqëri. Përmes përdorimit të dokumenteve historike, hartave dhe materialeve arkivore, ajo shqyrton mënyrat se si kufijtë territorialë dhe narrativat politike ndikojnë në formësimin e identitetit dhe kujtesës kolektive.

Veprat e Čmajčanin janë prezantuar në institucione dhe ngjarje ndërkombëtare të artit, përfshirë Bienalen e 58-të të Venecias (2019), Stedelijk Museum në Amsterdam (2015), Garage Museum of Contemporary Art në Moskë (2015), Pera Museum në Stamboll (2016) dhe Autostrada Biennale në Prizren (2019). Në vitin 2013, ajo u vlerësua me Çmimin Special në edicionin e 54-të të Sallonit të Tetorit në Beograd. Veprat e saj janë pjesë e koleksioneve ndërkombëtare, përfshirë Wien Museum në Vjenë dhe Muzeun Historik të Bosnjës dhe Hercegovinës në Sarajevë.

Në vitin 2024, Čmajčanin u bë pjesë e Reporting House në Prishtinë me instalacionin *Don’t Dream Dreams*, të kuruar nga Gazmend Ejupi. Vepra trajton marrëdhënien ndërmjet historisë së Bosnjës dhe Hercegovinës, ndërhyrjeve ndërkombëtare dhe diplomacisë perëndimore, duke shqyrtuar ndikimin e strukturave të pushtetit në kujtesën historike dhe përvojën kolektive të rajonit.

Denis Džidić

Denis Džidić është drejtor ekzekutiv dhe redaktor për BIRN Bosnjë dhe Hercegovinë (në portalin ‘Detektor’) që nga viti 2019. Karrierën e tij gazetareske e ka filluar në gazetën ditore Oslobođenje në vitin 2006.

Në BIRN Bosnjë dhe Hercegovinë hyri në vitin 2008. Shumicën e karrierës së tij ia ka përkushtuar çështjes së drejtësisë kalimtare dhe raportimit të krimeve të luftës në luftën e Bosnjës në vitet 1992-1995. Ka raportuar edhe nga Haga. Džidić ka punuar në “Institutin për Raportim të Luftës dhe Paqes ” në Sarajevë dhe në Hagë. Është fitues i disa çmimeve, ndër të tjera nga Shoqata “Biti Novinar” për kronika të vazhdueshme dhe kontribut të çmuar në zbulimin e së vërtetës rreth gjenocidit në Srebrenicë.

Nën udhëheqjen e tij, në vitin 2020, Detektori (program i BIRN Bosnje e hercegovinë) fitoi Çmimin Evropian për Shtyp për raportimet lidhur me gjykimet e krimeve të luftës, çështjeve të drejtësisë kalimtare dhe problemeve me të cilat janë përballur viktimat e luftës së viteve 90-ta. Aktualisht është anëtar i Komitetit Përgatitor të Çmimit Evropian për Shtyp. Është i diplomuar në Departamentin e Gazetarisë së Fakultetit të Shkencave Politike në Sarajevë dhe ka titull Magjistrature në drejtësi ndërkombëtare.

Emir Suljagić

Dr. Emir Suljagić është gazetar, autor, profesor dhe drejtor i Qendrës Memoriale Srebrenica-Potoçari që nga viti 2019.

Suljagić ka doktoraturë në Shkenca Politike nga Universiteti i Hamburgut. Ka shërbyer si Ministër i Arsimit në kantonin e Sarajevës nga 13 janar 2011
deri më 29 shkurt 2012 si dhe ka qenë zëvendësministër i Mbrojtjes nga 31 mars 2015 deri më 10 dhjetor 2015.

Ka punuar si përkthyes i gjuhës angleze për organizatën e Kombeve të Bashkuara në Srebrenicë dhe ka filluar karrierën e tij si gazetar duke punuar
për revistën javore, fituese të çmimeve të ndryshme, Dani. Suljagić ka punuar si korrespondent i Institutit për Raportim të Luftës dhe Paqes, duke raportuar
nga Gjykata Ndërkombëtare për Krime në ish-Jugosllavinë (ICTY). Mes tjerash, ka botuar për revistat New York Times, Boston Globe, AlJazeera, El Pais, Die Zeit dhe Oslobođenje. Suljagić ka ligjeruar lëndën Marrëdhënie Ndërkombëtare në Universitetin Ndërkombëtar të Sarajevës. Publikimi përkujtimor i tij “Kartolina nga Varri” (2003) paraqet rrëfimin e parë të një të mbijetuari të Srebrenicës të botuar në anglisht dhe më pas të botuar në tetë gjuhë të tjera.